తెలంగాణ జ్యోతి/ వెబ్ న్యూస్: ప్రస్తుతం నచ్చిన ఫుడ్ నిమిషాల వ్యవధిలో మన ముందు ఉంటోంది. జొమాటో, స్విగ్గీ వంటి ఆన్‌లైన్ ఫుడ్ డెలివరీ సంస్థలు ఈ బిజినెస్‌లో దూసుకెళ్తున్నాయి. నచ్చిన ఫుడ్ ఆర్డర్ చేసినప్పుడు మన చెంతకు చేర్చే డెలివరీ బాయ్స్ గురించి ప్రత్యేకంగా చెప్పనక్కర్లేదు. జొమాటోలో వేలాది మంది డెలివరీ బాయ్స్‌లో ఉపాధి పొందుతున్నారు. ఇంటికి ఫుడ్ డెలివరీ చేసినందుకు ఒక్కో ఆర్డర్‌పై వారికి కొంత కమీషన్ లభిస్తుంది. ఇలా రోజంతా కష్టపడుతూ నెల తిరిగే సమయానికి ఒక్కో జొమాటో డెలివరీ బాయ్ సగటున రూ. 50 వేల వరకు సంపాదించే అవకాశం ఉంది. వారి కష్టపడిన తీరును బట్టి వారి సంపాదన ఆధారపడి ఉంటుంది. అయితే, ఓ డెలివరీ బాయ్ గురించి మనం ప్రత్యేకంగా తెలుసుకోవాలి. ఆయన రోజుకు రూ.1 కోటి వరకు సంపాదిస్తున్నారు. అవునండీ అది నిజమే.జొమాటో ఫౌండర్, సీఈఓ దీపిందర్ గోయల్ ట్విట్టర్ ప్రొఫైల్, ఇన్‌స్టాగ్రామ్ ప్రొఫైల్ చూసిన వారికి ఇది అర్థమయ్యే ఉంటుంది. ఆయన తాను జొమాటో డెలివరీ బాయ్‌గానే పరిచయం చేసుకున్నారు. జోమాటోను స్థాపించిన దీంపితర్ అప్పుడప్పుడు స్వయంగా ఆర్డర్లు డెలివరీ చేస్తుంటారు. ఇంటింటికి వెళ్లి ఆహారం అందజేస్తారు. సోషల్ మీడియా ప్రొఫైల్స్‌లో తాను కూడా ఒక డెలివరీ బాయ్ అని దీపిందర్ గోయల్ రాసుకున్నారు.జొమాటో సంస్థ 2021లో స్టాక్ మార్కెట్లో లిస్టింగ్ అయింది. ఆ తర్వాత దీపిందర్ గోయల్ నికర సంపద విలువ 650 మిలియన్ డాలర్లకు (రూ.5,345 కోట్లకు) చేరుకుంది. ప్రస్తుతం ఆయనకు కంపెనీలో 4.7 శాతం వాటా ఉంది. ప్రస్తుతం గోయల్ కంపెనీ నుంచి ఒక్క రూపాయి కూడా జీతం అందుకోవడం లేదు. అయితే, ఎంప్లాయీ స్టాక్ ఓనర్ షిప్ ప్లాన్స్ (EPOPS) ద్వారా ఆయనకు రూ.358 కోట్లు అందాయి. ఈ లెక్కన రోజుకు రూ.కోటి సంపాదించినట్లే కదా. ప్రస్తుతం జొమాటో మార్కెట్ క్యాపిటలైజేషన్ రూ.66,875 కోట్లుగా ఉంది.దీపిందర్ గోయల్ పంజాబ్‌లోని ముక్త్‌సర్‌లో జిల్లాలో జన్మించారు. పాఠశాల స్థాయి వరకు చదువులో పెద్దగా రాణించలేకపోయిన గోయల్ 8వ తరగతి తర్వాత పూర్తిగా మారిపోయారు. స్కూల్ టాప్ ర్యాంకర్లలో ఒకడిగా మారిపోయారు. ఐఐటీ ప్రిపరేషన్ కోసం కుటుంబ సభ్యులు గోయల్‌ను చండీగఢ్ పంపించారు. కానీ, అక్కడి విద్యార్థులతో పోటీ పడలేక మధ్యలోనే ఇంటికి వచ్చారు. కానీ, ఢిల్లీ ఐఐటీలో సీటు సంపాదించారు. జీవితంలో ఎన్నో ఎత్తుపల్లాలు చూసిన దీపిందర్ ప్రస్తుతం కోట్ల రూపాయల కంపెనీని స్థాపించి దూసుకెళ్తున్నారు.
