తెలంగాణ జ్యోతి వెబ్ న్యూస్: అంతరిక్ష కేంద్రం (ఐఎస్‌ఎస్)లోని వ్యోమగాములు ప్రమాదంలో పడ్డారు. సూపర్ బగ్‌గా పిలిచే ‘ఎంటర్‌బాక్టర్ బుగాన్‌డెన్సిస్’ అనే బ్యాక్టీరియా అక్కడ ఉన్నట్టు శాస్త్రవేత్తలు గుర్తించారు. మూసి ఉండే వాతావరణంలో వేగంగా పెరిగే ఈ బ్యాక్టీరియా బహుళ ఔషధాలను నిరోధించ గలిగే శక్తిమంతమైనదని ఆందోళన వ్యక్తం చేస్తున్నారు. ఇది మల్టీ-డ్రగ్ రెసిస్టెంట్ కావడంతో దీనిని ‘సూపర్ బగ్’ అని పిలుస్తుంటారు. శ్వాసకోశ వ్యవస్థపై ఈ బ్యాక్టీరియా తీవ్ర ప్రభావం చూపుతుందని నిపుణులు పేర్కొన్నారు.ఈ ‘స్పేస్‌బగ్’తో ప్రస్తుతం అంతర్జాతీయ అంతరిక్ష కేంద్రంలో ఉన్న భారత సంతతి వ్యోమగామి సునీతా విలియమ్స్‌ సహా తొమ్మిది మంది వ్యోవగాములు ఇబ్బందుల్లో పడ్డారు. జూన్ 6న న్యూ బోయింగ్ స్టార్‌లైనర్ స్పేస్‌క్రాఫ్ట్ ద్వారా వ్యోమగామి బారీ యూజిన్‌తో కలిసి సునీతా విలియమ్స్‌ అంతర్జాతీయ అంతరిక్ష కేంద్రానికి చేరుకున్న విషయం తెలిసిందే. వారం రోజుల అనంతరం వారు భూమికి తిరిగి చేరుకోనున్నారు. అప్పటికే మరో ఏడుగురు వ్యోమగాములు చాలా కాలంగా అక్కడ విధులు నిర్వర్తిస్తున్నారు. అయితే, ఈ ‘స్పేస్ బగ్స్‘ గ్రహాంతరజీవులకు సంబంధించింది కాదని, వ్యోమగాముల ద్వారా భూమి నుంచి ఐఎస్ఎస్‌కు చేరి ఉంటుందని శాస్త్రవేత్తలు భావిస్తున్నారు.కాగా, అంతరిక్ష కేంద్రంలో వ్యోమగాములు ప్రత్యేక పరిస్థితుల్లో పనిచేస్తుంటారు. అంతరిక్ష యాత్రల సమయంలో వ్యోమగాములు విభిన్నమైన ఆరోగ్య సవాళ్లను ఎదుర్కొంటారు. సంప్రదాయ వైద్య సౌకర్యాలకు దూరంగా ఉంటారు కాబట్టి వ్యోమగాముల ఆరోగ్యంపై బ్యాక్టీరియా ప్రభావాన్ని అంచనా వేసే పరిశోధనలు కొనసాగుతున్నాయని శాస్త్రవేత్తలు పేర్కొన్నారు. ఈ పరిశోధనలకు నాసా జెట్ ప్రొపల్షన్ ల్యాబొరేటరీకి చెందిన భారతీయ శాస్త్రేవేత్త డాక్టర్ కస్తూరి వెంకటేశ్వరన్ సారథ్యం వహిస్తున్నారు. ఆయన నాసాలో చేరడానికి ముందు చెన్నైలోని అన్నామలై యూనివర్సిటీలో మెరైన్ మైక్రోబయాలజీపై అధ్యయనం చేశారు. గతేడాది మాజీ రాష్ట్రపతి డాక్టర్ ఏపీజే అబ్దుల్ కలాం పేరు మీదుగా ‘కలామిల్లా పియర్సోని’ అనే కొత్త మల్టీ-డ్రగ్ రెసిస్టెంట్ బగ్‌ని వెంకటేశ్వరన్‌ను కనుగొన్నారు.అధ్యయనంలో గుర్తించిన అంశాలు ఆ:దోళనకు గురిచేస్తున్నాయి. ఐఎస్ఎస్‌లోని దీని జన్యువులు.. భూమిపై ఉన్నవాటికి విభిన్నంగా ఉన్నాయని శాస్త్రవేత్తలు తెలిపారు. ఇతర సూక్ష్మజీవులతో సహా ఉనికిలో ఉన్న ఎంటర్‌బాక్టర్ బుగాండెన్సిస్ కొన్ని సందర్భాల్లో వాటి మనుగడకు సహకరించవచ్చని చెప్పారు.
