తెలంగాణ జ్యోతి/ వెబ్ న్యూస్: టీఆర్ఎస్ పేరును బీఆర్ఎస్‌గా మార్చుతూ తీసుకున్న నిర్ణయానికి కేంద్ర ఎన్నికల సంఘం ఆమోదముద్ర వేసిన విషయం తెలిసిందే. ఈ మేరకు బీఆర్ఎస్‌ను అధికారికంగా గుర్తిస్తూ గురువారం సీఎం కేసీఆర్‌కు ఈసీ పత్రాలు పంపించింది. ఇవాళ మధ్యాహ్నం 1.20 గంటలకు తెలంగాణ భవన్‌లో టీఆర్ఎస్ నేతలందరీ సమక్షంలో ఈ పత్రాలపై సంతకాలు చేసి ఈసీకి కేసీఆర్ రిప్లై పంపించనున్నారు. ఈసీ నుంచి పార్టీకి అనుమతి రావడంతో నేడు తెలంగాణ భవన్‌లో బీఆర్ఎస్ ఆవిర్భావ కార్యక్రమం జరపనున్నారు.బీఆర్ఎస్ ఆవిర్భావ కార్యక్రమంలో పార్టీ జెండాను తెలంగాణ భవన్‌లో కేసీఆర్ ఇవాళ ఆవిష్కరించనున్నారు. బీఆర్ఎస్‌కు అనుమతి ఇచ్చినందుకు సంబురాలు చేసుకుంటున్న తరుణంలో ఆ పార్టీకి ఊహించని పరిణామం ఎదురైంది. బీఆర్ఎస్ పేరుపై వరంగల్ జిల్లాకు చెందిన బానోత్ ప్రేమనాయక్ అనే వ్యక్తి అభ్యంతరం తెలుపుతూ ఈసీకి లేఖ రాశారు. జిల్లాలోని చెన్నారావుపేట మండలం తోపనగడ్డ తండాకు చెందిన బానోత్ ప్రేమనాయక్ అనే వ్యక్తి తాను భారతీయ రాష్ట్ర సమితి పేరుతో పాటు మరో మూడు పేర్లను గుర్తించాలని కోరుతూ సెప్టెంబర్ 5న ఈసీకి దరఖాస్తు పెట్టుకున్నట్లు చెబుతున్నాడు.తాను దరఖాస్తు చేసుకున్న భారతీయ రాష్ట్ర సమతి పేరుకు భారత్ రాష్ట్ర సమతి పేరు దగ్గరగా ఉందని, అందుకే భారత్ రాష్ట్ర సమతి పేరును టీఆర్ఎస్‌కు కేటాయించడం సరికాదని అభ్యంతరం తెలుపుతూ ఈసీకి లేఖ రాశారు. ముందుగా దరఖాస్తు చేసుకున్న తనకు భారతీయ రాష్ట్ర సమతి పేరు ఇవ్వాలని, దీనిపై తాను న్యాయపోరాటం చేస్తానంటూ బానోత్ ప్రేమ్‌నాయక్ చెబుతున్నాడు. శుక్రవారం బీఆర్ఎస్ ఆవిర్భావ కార్యక్రమాన్ని తెలంగాణ భవన్‌లో ఘనంగా నిర్వహించేందుకు ఏర్పాట్లు జరుగుతోన్నాయి. పార్టీ ఎమ్మెల్యేలు, ఎంపీలు, జిల్లాల అధ్యక్షులు, జిల్లా పరిషత్ ఛైర్మన్లు, డీసీసీబీ ఛైర్మన్లు, ఇతర పార్టీ ముఖ్య నేతలందరూ ఈ కార్యక్రమంలో పాల్గొననున్నారు. బీఆర్ఎస్ జెండాను గురువారం రాత్రి సీఎం కేసీఆర్ ఖరారు చేశారు. టీఆర్ఎస్ జెండాలో తెలంగాణ మ్యాప్ ఉండగా.. బీఆర్ఎస్ జెండాలో ఇండియా మ్యాప్ ఉండనుంది. గులాబీ రంగుతో పాటు కారు గుర్తును అలాగే కొనసాగించనున్నారు. ఈ జెండాను నేడు పార్టీ నేతల సమక్షంలో కేసీఆర్ ఆవిష్కరించనున్నారు. ఈ ఆవిర్భావ సభలో కేసీఆర్ మాట్లాడే అవకాశముంది. దీంతో కేసీఆర్ స్పీచ్‌పై అందరిలోనూ ఆసక్తి నెలకొంది. బీఆర్ఎస్ భవిష్యత్ కార్యాచరణ, వచ్చే ఎన్నికల్లో ఇతర రాష్ట్రాల్లో పోటీ విషయంపై కేసీఆర్ కీలక ప్రకటనలు చేసే అవకాశముందని తెలుస్తోంది.
