తెలంగాణ జ్యోతి/వెబ్ న్యూస్/బ్యూరో చీఫ్: తెలంగాణ వ్యాప్తంగా సంచలనం సృష్టించిన ఆదిభట్ల వైద్యురాలు వైశాలి కేసులో ప్రధాని నిందితుడు మిస్టర్ టీ ఓనర్ నవీన్ రెడ్డిని పోలీసులు గోవాలో అదుపులోకి తీసుకున్న సంగతి తెలిసిందే. గత రాత్రి (బుధవారం) నవీన్ రెడ్డిని ఇబ్రహీంపట్నం మేజిస్ట్రేట్ ముందు పోలీసులు హాజరుపరిచారు. నవీన్ రెడ్డితో పాటు మరో ఐదుగురికి కోర్టు 14 రోజుల రిమాండ్ విధించింది. దీంతో వారిని పోలీసులు జైలుకు తరలించారు. న్యాయమూర్తి ముందు హాజరు పరిచే ముందు నవీన్ రెడ్డి కీలక వ్యాఖ్యలు చేశారు. తనకు ప్రాణహాని ఉందని.., తాను గంట నిడివితో వీడియో రిలీజ్ చేస్తే తప్పు ఒప్పుకున్నట్లు ఒక నిమిషం వీడియోను ఎడిట్ చేసి రిలీజ్ చేశారన్నారు. “ఐ యామ్ నాట్ ఫీలింగ్ సేఫ్.. నేను వన్ అవర్ వీడియో రిలీజ్ చేస్తే నేను తప్పు ఒప్పుకున్నా.. అనే వన్ మినిట్ వీడియో రిలీజ్ చేశారు.” అంటూ నవీన్ రెడ్డి వ్యాఖ్యనించటం సంచలనం రేపుతోంది. మరోవైపు నవీన్ రెడ్డి కన్‌ఫెషన్ స్టేట్‌మెంట్‌లో కీలక అంశాలు వెలుగులోకి వచ్చాయి. తాను వైశాలిని ఎలా కిడ్నాప్ చేసింది, అక్కడి నుంచి ఎలా పారిపోయింది స్టేట్‌మెంట్‌లో వివరించారు.
“వైశాలి స్నేహితురాలు సంధ్య ద్వారా తను నాకు పరిచయమైంది. వైశాలి నేను కలిసి బ్యాడ్మింటన్ ఆడేవాళ్లం. వైశాలిని పెళ్లి చేసుకోవాలని అని అనుకున్నాను. నా ప్రేమ ప్రపోజల్‌ను వైశాలి ముందు పెట్టాను. వైశాలి నా ప్రేమను నిరాకరించింది. వైశాలి తండ్రి వద్ద నా ప్రేమ పెళ్లి ప్రపోజల్ పెట్టా. వైశాలి కుటుంబ సభ్యులు నా ప్రేమ పెళ్లిని అంగీకరించలేదు. వైశాలిని ఎలాగైనా పొందాలని వేధింపులు మెుదలు పెట్టా. నకిలీ ఇన్‌స్టాగ్రామ్ అకౌంట్‌తో వీడియోలు, ఫోటోలు పెట్టా. వైశాలి ఇంటి ముందే ల్యాండ్ లీజుకు తీసుకొని షెడ్ వేశా. అక్కడి నుంచి ప్రతి నిత్యం వైశాలిని వేధించేవాడిని. వైశాలి నిశ్చితార్ధం జరుగుతుందని తెలిసింది. నా దగ్గర పని చేస్తున్న వారందరిని ఆమె ఇంటికి తీసుకెళ్లా. వాళ్లు ఆవేశంతో ఇంట్లో వాళ్లపై దాడి చేసి ఫర్నీచర్ ధ్వంసం చేశారు. వైశాలిని కిడ్నాప్ చేసి తీసుకెళ్లాను. కారులో వైశాలిని చిత్ర హింసలకు గురి చేశాను. పోలీసులు నన్ను గాలిస్తున్నారని తెలిసి భయపడిపోయా. వైశాలిని క్షేమంగా వాళ్ల ఇంటి సమీపంలో వదిలిపెట్టి అక్కడి నుంచి వెళ్లిపోయాం. 3 రోజులుగా వివిధ మార్గాల ద్వారా గోవాకు చేరుకున్నాం. వైశాలి అంటే నాకు అమితమైన ప్రేమ. వైశాలిని నేను ఏం చేయాలని అని అనుకోలేదు. అందుకే వైశాలిని క్షేమంగా ఇంటికి పంపించాను.” అని నవీన్ రెడ్డి కన్‌ఫెషన్ స్టేట్‌మెంట్‌లో వివరించారు.
