తెలంగాణ జ్యోతి వెబ్ న్యూస్: చైనాను వణికిస్తోంది. శీతాకాలం సందర్భంగా పర్వతాల్లో హిమపాతం కొనసాగుతుండగా.. మైదాన ప్రాంతంలో చలిగాలులు కొనసాగుతున్నాయి. ఇక చైనాలోని కొన్ని ప్రాంతాల్లో అయితే ఉష్ణోగ్రత -40 డిగ్రీలకు పడిపోయింది. మరోవైపు.. ప్రస్తుతం రాజధాని బీజింగ్ నగరంలో ఉష్ణోగ్రత -10 డిగ్రీల సెల్సియస్‌గా నమోదైనట్లు అధికారులు వెల్లడించారు. అయితే గత 9 రోజులుగా మంచు తుఫాన్ కొనసాగుతోందని తెలిపారు. ఇక 1951 నుంచి బీజింగ్‌లో నమోదైన అతి ఎక్కువ రోజులుగా చలి గాలులు వీయడం ఇదే తొలిసారి అని పేర్కొన్నారు.బీజింగ్‌లోని నంజియావో వాతావరణ కేంద్రంలో నమోదైన ఉష్ణోగ్రత లెక్కల ప్రకారం ఆదివారం మధ్యాహ్నం మొదటిసారిగా సున్నా డిగ్రీల సెల్సియస్‌కు చేరుకుందని చైనా నేషనల్ మీడియా బీజింగ్ డైలీ నివేదించింది. అయితే ప్రస్తుతం రాజధానిలో -10 డిగ్రీల సెల్సియస్ ఉష్ణోగ్రత కొనసాగుతోందని ప్రకటించింది. డిసెంబర్ 11 వ తేదీన మొదటిసారి ఉష్ణోగ్రత సున్నా డిగ్రీల కంటే తక్కువకు పడిపోయిందని వెల్లడించింది. ఇక చైనాలోని పలు ప్రాంతాల్లో ఉష్ణోగ్రత -40 డిగ్రీల సెల్సియస్‌కు చేరుకుందని.. 300 గంటలకు పైగా చలిగాలులు కొనసాగుతున్నాయని పేర్కొంది.భారీగా చలిగాలులు, మంచు కురుస్తుండటంతో జనజీవనం ఎక్కడికక్కడ నిలిచిపోయింది. ఆస్పత్రులు, అత్యవసర సేవలు మినహా ఇతర అన్ని రకాల పనులు రద్దు అయ్యాయి. ఇక మంచు తుపాను కారణంగా రెండు మెట్రోలు ఒకదానికొకటి ఢీకొనడం తీవ్ర సంచలనంగా మారింది. బీజింగ్‌లో బిజీ సబ్‌వే లైన్‌లో రెండు రైళ్లు ఢీకొనడంతో వందలాది మంది ప్రయాణికులు బీజింగ్‌లోని ఆస్పత్రిలో చేరినట్లు నగర రవాణా అధికారి తెలిపారు. ఈ నెలలో బీజింగ్‌లోనే కాకుండా చైనాలోని చాలా ప్రాంతాల్లో చలిగాలులు ప్రజలను వణికిస్తున్నట్లు అధికారులు వెల్లడించారు. ఆస్పత్రులు, అత్యవసర సేవలతో పాటు ఇతర వ్యాపార కార్యకలాపాలు నిలిచిపోయాయి. ప్రజలు ఇళ్లకే పరిమితం అయ్యారు.చైనాలో ఈ నెలలో కోల్డ్ వేవ్‌ భీకరంగా ఉండటంతో దేశవ్యాప్తంగా హీటర్లు ఉపయోగిస్తున్నారు. దీంతో చైనాలో ఒక్కసారిగా పవర్ డిమాండ్ అమాంతం పెరిగిపోయింది. పవర్ డిమాండ్ పెరిగిపోవడంతో పవర్ ప్లాంట్లు పూర్తి సామర్థ్యానికి మించి పనిచేస్తున్నాయి. ఇలా డిమాండ్ పెరిగిపోవడంతో సెంట్రల్‌ ప్రావిన్స్‌ హెనాన్‌లో పలు పవర్ ప్లాంట్లు ఫెయిల్‌ అయ్యాయి. ఆస్పత్రులు, స్కూళ్లు, ఇళ్లల్లో మాత్రమే హీటర్లు పనిచేయడానికే అనుమతిస్తున్నారు. ప్రభుత్వ ఆఫీసులు, ప్రభుత్వ కంపెనీల్లో హీటర్ల వాడకాన్ని నిలిపివేశారు.
