తెలంగాణ జ్యోతి వెబ్ న్యూస్: ఎన్నికల తేదీలపై జరుగుతున్న ప్రచారానికి బ్రిటన్ ప్రధాని రిషి సునాక్ ముగింపు పలికారు. జులై 4న దేశంలో ఎన్నికలు నిర్వహించనున్నట్లు సునాక్ ప్రకటించారు. దీనికి అనుగుణంగా త్వరలోనే పార్లమెంటును రద్దు చేయనున్నట్లు ఆయన తెలిపారు. తన అధికారిక నివాసం ‘10 డౌనింగ్‌ స్ట్రీట్‌’ నుంచి ప్రసంగించిన ప్రధాని.. యూకే ప్రజలు తమ భవిష్యత్తు ఎలా ఉండాలో నిర్ణయించుకునే సమయం వచ్చిందని అన్నారు. ఆర్థిక మంత్రిగా, ప్రధానిగా తన హయాంలో సాధించిన విజయాలను ఆయన ఈ సందర్భంగా గుర్తుచేశారు. దేశ ప్రజల రక్షణ కోసం తన శక్తివంచన లేకుండా కృషి చేస్తానని వాగ్దానం చేశారు. దేశాధినేత కింగ్ చార్లెస్ IIIతో మాట్లాడానని, పార్లమెంటును రద్దు చేయమని అభ్యర్థించానని చెప్పారు. ఇందుకు రాజు అనుమతించడంతో జులై 4న ఎన్నికలు జరగనున్నాయని పేర్కొన్నారు.ప్రధాని హోదాలో తొలిసారి బరిలోకి దిగుతున్న రిషి సునాక్‌కు రాబోయే ఎన్నికలు అగ్ని పరీక్షలాంటివే. అక్టోబరు 2022న బ్రిటన్ ప్రధానిగా భారత సంతతికి చెందిన సునాక్ బాధ్యతలు చేపట్టిన విషయం తెలిసిందే. అయితే, విపక్ష లేబర్‌ పార్టీ వచ్చే ఎన్నికల్లో మెరుగైన ఫలితాలు సాధిస్తుందని అత్యధిక ఒపీనియన్‌ పోల్స్‌ అంచనా వేస్తున్నాయి. దీంతో అధికార కన్జర్వేటివ్‌ పార్టీకి ఇబ్బందికరంగా మారింది.2016లో బ్రెగ్జిట్ రిఫరెండం తర్వాత జరుగుతున్న మూడో ఎన్నికలు ఇవి. బ్రెగ్జిట్ నుంచి వైదొలగిన తర్వాత జీవన వ్యయం దెబ్బతినడంతో యూకే ప్రజలను ఆకర్షించేందుకు మెరుగైన ఆర్థిక విధానాల అమలకు సునాక్ ప్రయత్నించారు. 2022 చివరి నాటికి 11 శాతానికి పైగా ఉన్న ద్రవ్యోల్బణాన్ని ఏడాదిలో సగానికి తగ్గిస్తానని సునాక్ వాగ్దానం చేశారు. చెప్పినట్టుగానే గత సంవత్సరంలో మూడేళ్ల కనిష్టానికి ద్రవ్యోల్బణం దిగివచ్చింది. కోవిడ్-19 మహమ్మారి సమయంలో అదనపు చెల్లింపులతో మిలియన్ల ఉద్యోగాలను కాపాడి, ఆర్థిక వ్యవస్థను అదుపులోకి తెచ్చిన నాయకుడిగా సునక్ తన సహకారాన్ని చర్చించారు. ‘ఆ పునాదిని సురక్షితమైన భవిష్యత్తుగా మార్చడానికి మీరు ఎలా, ఎవరిని విశ్వసిస్తారు’ అనే దాని చుట్టూ ఎన్నికలు తిరుగుతాయని వ్యాఖ్యానించారు.యూకే పార్లమెంట్ దిగువ సభ హౌస్ ఆఫ్ కామన్స్‌కు మొత్తం 650 మంది ఎంపీలను ఐదేళ్ల పదవీకాలానికి ఎన్నుకోనున్నారు. మెజార్టీ స్థానాలను దక్కించుకున్న పార్టీ ప్రభుత్వాన్ని ఏర్పాటు చేయనుంది. ఆ పార్టీ ఎంపీలు ఎన్నుకున్న నేత ప్రధాని అవుతారు. యూకే ఎన్నికలు తప్పనిసరిగా ఐదేళ్లకు మించకుండా జరగాలి. కానీ, ఆ వ్యవధిలో సమయాన్ని ఎంపిక చేసుకునే అధికారం ప్రధానమంత్రికి ఉంటుంది. ఎన్నికల తేదీని నిర్ధారించడానికి సునాక్‌కి డిసెంబర్ వరకు సమయం ఉంది.
