తెలంగాణ జ్యోతి/వెబ్ న్యూస్: డోర్నకల్-మిర్యాలగూడ మధ్య కోదాడ, హుజూర్‌నగర్‌లను రైల్వేలతో అనుసంధానించే కొత్త రైలు మార్గాన్ని మంజూరు చేయడాన్ని కాంగ్రెస్ ఎంపీ, టీపీసీసీ మాజీ అధ్యక్షుడు కెప్టెన్ ఎన్.ఉత్తమ్ కుమార్ రెడ్డి స్వాగతించారు. గాంధీభవన్‌లో ఏర్పాటు చేసిన విలేకరుల సమావేశంలో ఉత్తమ్‌కుమార్‌రెడ్డి మాట్లాడుతూ.. కోదాడ, హుజూర్నగర్ ఎమ్మెల్యేగా, ప్రస్తుతం నల్గొండ ఎంపీగా ఉన్న తాను రెండు నియోజకవర్గాలను రైల్వేతో అనుసంధానం చేసేందుకు కొత్త రైల్వేలైన్‌ మంజూరు కోసం రైల్వే శాఖకు పలుమార్లు వినతిపత్రాలు అందజేశానని అన్నారు. కోదాడ, హుజూర్నగర్ మీదుగా డోర్నకల్-మిర్యాల్‌గూడ మధ్య 93.10 కిలోమీటర్ల మేర కొత్త సింగిల్‌ ఎలక్ట్రిఫికేషన్‌ లైన్‌కు రైల్వే మంత్రిత్వ శాఖ సూత్రప్రాయంగా ఆమోదం తెలిపిందని తెలిపారు. వాస్తవానికి ఈ ప్రాజెక్టుకు 2013-14లో అనుమతి లభించిందని, ప్రస్తుతం దీనికి సూత్రప్రాయ ఆమోదం లభించిందని చెప్పారు. ఈ ప్రాజెక్టు వ్యయం రూ. 1294.12 కోట్లు అని ఇది రాబోయే నాలుగేళ్లలో గ్రౌండింగ్ అయ్యే అవకాశం ఉందన్నారు. రెండు కొత్త రైల్వేస్టేషన్లు సహా 11 స్టేషన్లను కలుపుతూ కొత్త రైల్వే లైన్ ఉంటుందని ఉత్తమ్ కుమార్ రెడ్డి తెలిపారు. పాపట్‌పల్లి, గొల్లపాడు, గుర్రాలపాడు, గువ్వలగిడెం, నేలకొండపల్లి, రామచంద్రాపురం, కోదాడ, హుజూర్నగర్, ఎర్రగుట్ట వర్ధాపురం, జనపహాడ్ లు ఉన్నాయని అన్నారు. కోదాడ, హుజూర్‌నగర్‌లు సిమెంట్ కంపెనీలు, రైస్‌ మిల్లులకు కేంద్రంగా ఉన్నాయని, ఉమ్మడి నల్గొండ జిల్లాకే కాకుండా ఖమ్మం జిల్లాకు కూడా కొత్త రైల్వేలైన్‌ వల్ల మేలు జరుగుతుందన్నారు. ఆహార ధాన్యాలు, సిమెంట్, గ్రానైట్, ఎరువులు, బొగ్గు రవాణా కోసం కొత్త రైల్వేలను ఉపయోగించాలని రైల్వే ప్రతిపాదించిందని ఆయన చెప్పారు. రైల్వే శాఖ నిర్వహించిన సర్వేలో 15.69% రిటర్న్ రేటు (ఆర్‌ఓఆర్)తో ప్రాజెక్ట్ వాణిజ్యపరంగా లాభదాయకమని ప్రకటించిందని ఆయన చెప్పారు. నల్గొండ, ఖమ్మం జిల్లాల్లోని కోదాడ, హుజూర్నగర్ తదితర ప్రాంతాల్లో ఈ ప్రాజెక్టు పూర్తయితే వాణిజ్య కార్యకలాపాలు ఊపందుకుంటాయని ఉత్తమ్‌కుమార్‌రెడ్డి చెప్పారు.
