వారి న‌వ‌హ్నిక బ్రహ్మోత్సవాల్లో భాగంగా స్వర్ణరథంపై శ్రీవేంకటాద్రీశుడు విహరించి భక్తులను అనుగ్రహించారు. ఆరవ రోజైన సాయంత్రం 4 నుంచి 6 గంటల వరకు శ్రీవారు బంగారు తేరులో పయనించి భక్తుల్ని తన కృపాకటాక్షాలతో అనుగ్రహించాడు. దాసభక్తుల నృత్యాలతోను, భజనబృందాల కోలాహలం, మంగ‌ళ‌వాయిద్యాల న‌డుమ తిరు మాడవీధుల్లో కడురమణీయంగా స్వర్ణర‌థోత్సవం అత్యంత వైభ‌వంగా జరిగింది. మ‌హిళ‌లు పెద్ద సంఖ్యలో పాల్గొని శ్రీవారి స్వర్ణర‌థ‌న్ని లాగారు.స్వర్ణరథంపై ఆసీనుడైన శ్రీవారికి శ్రీ, భూదేవులు ఇరుప్రక్కలా ఉన్నారు. శ్రీదేవి సువర్ణమయి. ఆమే బంగారు కాగా, ఆమెను భరించే స్వామికి బంగారు రథంలో ఊరేగడం ఎంతో ఆనందం. బంగారం శరీరాన్ని తాకుతుంటే శరీరంలో రక్త ప్రసరణ చక్కగా జరుగుతుంది. బంగారం మహా శక్తిమంతమైన లోహం. స్వామివారికి కృష్ణావతారంలో దారుకుడు సారథి, శైబ్య, సుగ్రీవ, మేఘపుష్ప, వలాహకాలనేవి నాల్గు గుర్రాలు. శ్రీవారి ఇల్లు బంగారం, ఇల్లాలు బంగారం, ఇంట పాత్రలు, సింహాసనం బంగారువి. అందుకని స్వర్ణరథం శ్రీవారికి అత్యంత ప్రీతిపాత్రమైనది. ఇరువైపులా శ్రీదేవి, భూదేవీ ఉండగా శ్రీవారు మధ్యలో ఉండి, స్వర్ణరథంలో ఊరేగడం.. స్వామివారి మహోన్నతినీ, సార్వభౌమత్వాన్నీ, శ్రీసతిత్వాన్నీ, భూదేవీనాథత్వాన్నీ సూచిస్తున్నది. ఈ స్వర్ణరథోత్సవాన్ని దర్శించడంవల్ల లక్ష్మీదేవి కరుణతో బంగారు, మణులు, సంపదలు, భోగభాగ్యాలూ, భూదేవి కరుణతో, సమస్త ధాన్యాలూ, శ్రీవారికరుణతో సర్వశుభాలూ, సుఖాలూ చేకూరుతాయి.
