తెలంగాణ జ్యోతి/ వెబ్ న్యూస్: ఐపీఎల్‌-16వ సీజన్‌లో భాగంగా రాయల్ ఛాలెంజర్స్ బెంగళూరు(Royal Challengers Bangalore), లక్నో సూపర్ జెయింట్స్(Lucknow Super Giants) మ్యాచ్ సందర్భంగా తలెత్తిన వివాదం ఇప్పట్లో సద్దుమణిగేలా కన్పించడం లేదు. రాయల్ ఛాలెంజర్స్ బెంగళూరు స్టార్ ప్లేయర్ విరాట్ కోహ్లీ, లక్నో సూపర్ జెయింట్స్ ఆటగాడు నవీన్ ఉల్ హక్, మెంటార్ గంభీర్ మధ్య తలెత్తిన ఘర్షణ గురించి తెలిసిందే. ఈ ఘటనను విరాట్ కోహ్లీ మర్చిపోయినా.. అఫ్గాన్ ఆటగాడు, లక్నో ప్లేయర్ నవీన్ ఉల్ హక్ మాత్రం వదిలేలా కన్పించడం లేదు.మే 1 లక్నో, ఆర్సీబీ మ్యాచ్ జరగ్గా అప్పటినుండి వివాదం కొనసాగుతూనే ఉంది. మ్యాచు సందర్భంగా కోహ్లీ తన షూను చూపిస్తూ.. ఏదో అనడంతో నవీన్ ఉల్ హక్‌కు కోపం తెప్పించింది. మ్యాచు తర్వాత కూడా ఇదే విషయంపై కోహ్లీ-గంభీర్, నవీన్ ఉల్ హక్‌కు మధ్య ఘర్షణ జరిగింది. అంతటితో ఆగిపోకుండా.. మరుసటి రోజు విరాట్ కోహ్లీ, నవీన్ ఉల్ హక్ సోషల్ మీడియాలో స్టేటస్‌ల రూపంలో ఒకరిపై ఒకరు పరోక్షంగా విమర్శలు చేసుకున్నారు. ఆ తర్వాత విరాట్ కోహ్లీ దీనిపై స్పందించలేదు. కానీ నవీన్ ఉల్ హక్ మాత్రం ఆ విషయాన్ని ఇంకా మర్చిపోలేదు.మంగళవారం వాంఖడే మైదానంలో ముంబయి-బెంగళూరు జట్లు తలపడ్డాయి. ఈ మ్యాచ్‌లో 4 బంతులను ఎదుర్కొన్న విరాట్ కోహ్లి ఒక పరుగు మాత్రమే చేసి క్యాచ్ అవుట్ అయ్యాడు. ఈ సమయంలో నవీన్ ఉల్ హక్ సోషల్ మీడియాలో విరాట్‌ను ఉద్దేశించి పరోక్షంగా పోస్టు పెట్టాడు. తన ఇన్‌స్టాగ్రామ్‌లో ఒక ఫోటోను స్టోరీగా పెట్టాడు. ముంబయి, బెంగళూరు మ్యాచును తాను టీవీలో చూస్తున్న దృశ్యాన్ని ఇన్‌స్టాలో పెట్టిన నవీన్ ఉల్ హక్.. స్వీట్ మ్యాంగోస్ అంటూ క్యాప్షన్ ఇచ్చాడు.ముంబయి ఇండియన్స్ మ్యాచు గెలుపుకు చేరువైన సమయంలోనూ ఈ లక్నో ప్లేయర్ మరో పోస్టు చేశాడు. రౌండ్ నెంబర్ 2 అంటూ క్యాప్షన్ ఇచ్చాడు.నవీన్ ఉల్ హక్ ఈ పోస్టుల ద్వారా ఆర్సీబీకి, కోహ్లికి కౌంటర్ ఇచ్చినట్లు క్రీడా విశ్లేషకులు భావిస్తున్నారు. కోహ్లీతో నవీన్ ఉల్ హక్ వివాదం ఇప్పట్లో సద్దుమణిగే అవకాశం లేదని అభిప్రాయపడతున్నారు. అనవసరంగా కోహ్లీని గెలకవద్దని, కెరీర్‌లో తీవ్రంగా నష్టపోతావని నవీన్ ఉల్ హక్‌ను కోహ్లి ఫ్యాన్స్ హెచ్చరిస్తున్నారు.ముంబయి-ఆర్సీబీ మధ్య జరిగిన పోరులో రోహిత్ టీం విజయం సాధించింది. 6 వికెట్ల తేడాతో బెంగళూరుపై గెలిచిన ముంబయి ఇండియన్స్ పాయింట్ల పట్టికలో 3వ స్థానానికి ఎగబాకింది. ఆర్సీబీ ఏడో స్థానానికి పడిపోయింది.
