ఇదెక్కడి వింత పెళ్లి రా నాయనా..

తెలంగాణ జ్యోతి/ వెబ్ న్యూస్: పెళ్లి అనగానే వధూవరులు నచ్చడం అనేది అన్నిటికన్నా ముందు చూస్తారు. వారిద్దరూ నచ్చిన తర్వాతే తర్వాతి కార్యక్రమాలు మొదలు పెడతారు. అమ్మాయి, అబ్బాయి తమ ఇష్టాలు, అభిరుచులు ఇలా పెళ్లికి ముందే పంచుకుని.. ఇద్దరి అభిప్రాయాలు కలిస్తేనే పెళ్లికి ముందడుగు వేస్తారు. అలా కాకుండా ఇద్దరికీ బేధాభిప్రాయాలు ఉంటే ఆ పెళ్లిని వద్దనుకుని.. ఎవరి దారి వారు చూసుకుంటారు. ఇప్పుడు ఇదే ట్రెండ్ నడుస్తోంది. పెళ్లయిన తర్వాత గొడవలు పడేకంటే పెళ్లికి ముందే ఒకరి గురించి మరొకరు తెలుసుకుని.. అన్ని ఓకే అనుకుంటేనే ఈ కాలంలో పెళ్లిళ్లు చేసుకుంటున్నారు. అయితే తన ఇష్టాలు, అభిరుచులకు తగ్గ వాడిని వెతికిన ఓ మహిళ చివరికి విసిగిపోయింది. చివరికి తనకు తానే పెళ్లి కూడా చేసుకుంది. అందుకోసం ఏకంగా రూ.10 లక్షలు కూడా ఖర్చు పెట్టింది.బ్రిటన్‌కు చెందిన 42 ఏళ్ల సారా విల్కిన్‌సన్ అనే మహిళ 20 ఏళ్లుగా తన లైఫ్ పార్ట్‌నర్ కోసం తిరిగింది. తన ఇష్టాలు, అభిరుచులకు తగ్గవాడు కావాలని ఎంతో వెతికింది. జీవిత భాగస్వామి కోసం 22 ఏళ్ల వయసు నుంచే ప్రయత్నాలు ప్రారంభించిన సారా విల్కిన్‌సన్.. 42 ఏళ్లు వచ్చే వరకు సుదీర్ఘంగా వేచి ఉంది. అయినప్పటికీ తనకు నచ్చిన వారు దొరక్కపోవడంతో చివరికి తనను తానే పెళ్లి చేసుకుంది. ఇంగ్లండ్‌లోని ఫెలిక్స్‌స్టో ప్రాంతంలో నివసించే సారా.. ఇటీవలే హార్వెస్ట్ హౌస్‌లో ఘనంగా తనను తానే వివాహం చేసుకుంది. తనకు చిన్నతనం నుంచి పెళ్లిలో డైమండ్ రింగ్ ధరించాలనే కల ఉండేదని.. ఇప్పుడు తనను తాను పెళ్లి చేసుకోవడంతో ఆ కల నెరవేరిందని సారా తెలిపింది.ఇప్పుడు ఈ పెళ్లి బ్రిటిష్ మీడియాలో సంచలనంగా మారింది. ఇలా తనను తానే పెళ్లి చేసుకోవడంతో ఈ పెళ్లికి అధికారిక గుర్తింపు మాత్రం దక్కలేదు. అంగరంగ వైభవంగా పెళ్లి వేడుకలను ఏర్పాటు చేసుకున్న సారా.. గ్రాండ్‌ వెడ్డింగ్‌లకు ధీటుగా.. డెకరేషన్‌, నోరూరించే వంటకాలు, డ్రింక్స్‌.. ఇలా అన్నీ తన పెళ్లిలో ఉంచింది. తనను తానే పెళ్లి చేసుకోవడానికి రూ.10 లక్షలు కూడా ఖర్చు చేసింది. అయితే పెళ్లి కోసం ఆ రూ.10 లక్షలను గత కొన్నేళ్ల నుంచి సారా డబ్బులు పొదుపు చేసింది.సారా పెళ్లికి ఆమె బంధువులు, కుటుంబ సభ్యులు, స్నేహితులు, సన్నిహితులు భారీగానే హాజరయ్యారు. సారా ఇలాంటి నిర్ణయం తీసుకోవడం తమకు ఆశ్చర్యం కలిగించిందని ఆమె కుటుంబ సభ్యులు వెల్లడించారు. ఇక ఈ పెళ్లి వేడుకను సారా ఫ్రెండ్, ప్రొఫెషనల్ వెడ్డింగ్ ప్లానర్ కేథరీన్ క్రెస్‌వెల్ నిర్వహించారు. సారా పెళ్లి వేడుకలో తమ చిన్ననాటి ఫ్రెండ్స్ అంతా కలుసుకోవడం చాలా సంతోషంగా ఉందని కేథరీన్ చెప్పారు. అయితే ఇప్పుడు తనను తాను పెళ్లి చేసుకున్నప్పటికీ.. సరైన జోడీ దొరికే వరకు వెతుకుతూనే ఉంటానని సారా విల్కిన్‌సన్ స్పష్టం చేసింది.